Kva er anleggsmiddel?
Anleggsmiddel er fysiske eigedelar som bedrifta di eig, og som er meint til varig bruk.
Kva eigedelar kan kategoriserast som anleggsmiddel?
Anleggsmiddel går òg under namna langsiktige eigedelar og varige driftsmiddel, og er dei fysiske eigedelane som bedrifta di har tenkt å eige eller bruke over lang tid.
Døme på anleggsmiddel er bilar, maskiner, PC-ar, elektronikk, eigedom eller liknande. Anleggsmiddel kan òg vere finansielle eigedelar.
Eigedelar som varer kortare enn eitt år, og som lett kan gjerast om til pengar gjennom sal eller innkreving, kallast for omløpsmiddel.
Avskrive ein eigedel i rekneskapen
Det du kjøper inn til bedrifta taper verdi over tid. For å ta høgde for verditapet, må eigedelen avskrivast i rekneskapen over levetida til eigedelen. Dette kallar ein å aktivere eigedelen. Ved å aktivere ein eigedel i rekneskapen, fordeler du kostnaden knytt til eigedelen over fleire år. Det gjer at rekneskapen reflekterer verkelegheita betre enn viss du fører heile innkjøpet i rekneskapen det same året som eigedelen blir kjøpt inn. På den måten gir det eit betre bilete av økonomien i bedrifta.
Sjølv om det kan vere vanskeleg å anslå kor lenge eit anleggsmiddel vil vare, må bedrifta estimere ei rimeleg levetid som kan brukast for å bokføre avskrivingane i rekneskapen. I rekneskapen vil avskrivningane, altså verdireduksjonen, komme fram som ein driftskostnad.
Kva eigedelar kan eg aktivere?
Det er berre innkjøp som blir klassifisert som eigedelar som kan aktiverast og avskrivast i rekneskapen. Ein eigedel kan aktiverast viss følgande tre kriterium er oppfylt:
- Eigedelen skal brukast i bedrifta, og de forventar å ha eigedelen i eitt år eller lenger.
- Eigedelen har ei forventa levetid på meir enn 3 år.
- Eigedelen er av vesentleg verdi, som vil seie over 15.000 kroner.
Ein eigedel som ikkje taper seg i verdi, eller som ikkje oppfyller dei tre kriteria over, blir førte som ein kostnad i rekneskapen inneverande år.
Kva er finansielle anleggsmiddel?
Finansielle anleggsmiddel er langsiktige investeringar, som aksjar, obligasjonar, delar og andre varige finansielle middel som varer over eitt år. Investeringar som blir realiserte før eitt år har gått, kallast for finansielle omløpsmiddel.