Svindel – slik unngår du å bli lurt
Svindel er dessverre eit aukande problem, og det kan ramme alle typar bedrifter. Her er tipsa våre til å unngå å bli lurt.
Vern bedrifta med gode rutinar og bevisst kultur
Dei kriminelle blir stadig meir sofistikerte, og leitar heile tida etter svakheiter dei kan utnytte. Med desse grepa er bedrifta di tryggare mot angrep.
- Styrk passordsikkerheita. Sørg for at de ikkje bruker same passord fleire stader, at passorda er vanskelege å gjette, og at de aktiverer tofaktor- eller multifaktorautentisering.
- Sikre domene gjennom overvaking og automatiske fornyingar. Då sikrar du at ingen andre får tilgang til dei.
- Innfør dobbelt godkjenning av betalingar, spesielt ved store transaksjonar.
- Sjekk transaksjonane opp mot rekneskapen. Ved å avstemme kontoen ser du om ein faktura har kome dobbelt opp.
- Køyr opplæring og kurs om sikkerheit, og skap ein god tryggingskultur ved å fremme tillit og openheit.
- Implementer rutinar for automatiserte tryggingsoppdateringar og for å sikre at programvara de bruker er oppdatert.
- Bruk sikre kanalar for å oppdatere betalingsinformasjon.
Nokre bedrifter er meir utsett enn andre
Alle kan rammast av svindel, men det er nokre gjengangarar. Fell bedrifta di under ein av desse kategoriane bør du vere ekstra årvåken.
Sjansen for at bedrifta di er spesielt attraktiv for svindlarar, aukar dersom bedrifta di har mange og varierte betalingar. Det er derfor svært viktig å ha gode interne
kontrollrutinar, slik at de er mindre utsett for forsøk på å få gjennom store
betalingar.
Dersom bedrifta di kjøper varer og tenester frå utlandet, er det viktig å vere påpasseleg. Sjansen for at ein av leverandørane dykkar blir utsett for hacking, og dermed sender falske fakturaer til bedrifta di frå e-posten til leverandøren og/eller
fakturasystem, er større.
Svindlarane er spesielt glad i enkeltpersonsforetak (ENK), start-ups og små og mellomstore bedrifter – særleg dersom det er dagleg leiar som står for dei administrative oppgåvene åleine.
Dårleg magekjensle? Gjer dette før du betaler:
- Ved store betalingar eller ved betaling til nye leverandørar, be om bankstadfesting frå motparten.
- Har motparten endra kontonummer, e-postadresse eller domene? Ta ein ekstra sjekk!
- Diskuterer du og motparten eit betalingsoppdrag du er i tvil om? Skift kanal! Ta kontakt på telefon eller SMS i staden for å svare i e-posttråden.
- Vêr skeptisk til fakturaer som kjem frå ei gratis e-postteneste, som gmail, hotmail og liknande.
- Har du mottatt to fakturaer for det same beløpet kort tid etter kvarandre? Sjekk kva som skil dei to fakturaene.
- Eksisterer faktisk bedrifta du betaler til? Undersøk bedrifta eller mottakar ved å til dømes søke opp firmaet på sider som proff.no eller føretaksregisteret i landet.
