Handel med kryptovaluta og virtuell valuta
I påvente av tydeleg rettleiing frå norske myndigheiter har dei fleste norske banker etablert strenge reglar for handtering av transaksjonar og gevinstar.
Risiko for kvitvasking
Handel med kryptovaluta/virtuell valuta er i utgangspunktet lovleg. Det er likevel knytta stor risiko til handel med slik valuta, og myndigheitene har advart mot investering i kryptovaluta. Risikoen er knytta til både verdiutvikling og at kriminelle miljø og useriøse aktørar utnyttar etterspurnaden til svindel av uvitande kundar. Kundar kan også utan å vite det bli involvert i kvitvaskingsoperasjonar iverksett av kriminelle aktørar.
Regulering og handtering
Kryptovaluta/virtuell valuta er lite regulert, og det er ikkje standarisert blant norske finansinstitusjonar korleis dette skal handterast. I påvente av tydelegare rettleiing frå norske myndigheiter, har dei fleste norske bankar etablert strenge reglar for handtering av transaksjonar og gevinstar knytta til verdiar frå kryptohandel.
Reglar for SpareBank 1 Sogn og Fjordane
Vi har etablert følgande reglar når det gjeld verdiar frå kryptohandel til konto i banken:
- Du må legge frem oversiktleg og komplett dokumentasjon på alle transaksjonar frå kryptovaluta blei kjøpt til gevinsten blei/blir sett inn på konto hos oss. Med dette meiner vi komplett kjøp og salshistorikk frå alle børsar det er handla på, samt kontooversikt som viser saldo på lommebok over tid.
- Vi kan i nokre tilfelle be om å få tilsendt dokumentasjon utarbeida av den aktuelle kryptobørsen som går god for at transaksjonane dine er legitime. Utarbeiding av ein slik rapport må bestillast av deg for di eiga rekning.
- Dersom handelen blei gjennomført via konto i annan bank, må du dokumentere korleis pengane som blei brukt til handelen er opptent.
- Transaksjonane må som hovedregel ha gått gjennom ein kryptobørs som er rapporteringspliktig til norsk regulatorisk myndigheit for at vi skal vurdere dokumentasjonen som vi mottar. Ytterlegare informasjon finn du på Finanstilsynet sine heimsider her. Vel konsesjonstype «Vekslings- og oppbevaringstjenester for virtuell valuta».
- Du må dokumentere at formue og eventuell gevinst er rapportert til skattemyndigheitene.
- All dokumentasjon skal vere oversett til norsk, og dine personalia må kome fram i dokumenta.
- All dokumentasjon må godkjennast av banken.