God læring i lommepengar

Snakk med barna om kva oppgåver dei skal få lønn for

Lommepengar er kanskje ikkje enkelt. Kor mykje og kor ofte skal de gi, skal det knytast opp mot oppgåver i heimen, og skal de overføre til kortet til barnet eller gi kontantar? Det er berre nokre av spørsmåla du som forelder må ta stilling til. Forbrukerøkonom Magne Gundersen i SpareBank 1 meiner at korleis de som familie ønsker å gi lommepengar er opp til kvar enkelt.

– Skal du lære barna verdien av pengar må du snakke med dei om at det ligg ein innsats bak kvar krone. Alle bør delta i oppgåvene i heimen, men nokre litt større oppgåver kan ein bli samde om at dei kan få betalt for. Det er viktig at barna blir følgt opp så dei veit kva det blir gitt lommepengar for og kva dei kan brukast til.  

Lære å spare, bruke, tene og dele

Mange foreldre snakker sjeldan, eller aldri med barna sine om forbruk og sparing. Dette har ei dokumentert betyding for korleis dei klarer seg økonomisk når dei skal stå på eigne bein som unge vaksne. Når lommepengar blir innført bør dei også få lov til å disponere desse pengane sjølv.

Eit tips er å la dei minste barna få kjøpe nokon av leikane sine sjølv. Etterkvart når barna blir eldre kan dei kjøpe og betale for litt større ting, dei kan til dømes kjøpe kleda sine sjølv. De foreldre kan gi ein sum pengar som skal gå til klede. Viss dei ønsker å kjøpe noko dyrt vil dei erfare at dei får mindre pengar til andre ting som kino, spel og anna gøy. Det vil også gi de eit fint høve til å snakke om sparing.

Når barna begynner å disponere eigne pengar er det viktig at de foreldre følger opp og er interesserte, meiner Gundersen.

– Ver nysgjerrig og vis interesse for barnet sin økonomi og sparing. Saman kan de sjekke saldo før og etter dei har handla for då ser dei heilt konkret kor mykje dei har brukt og kor mykje dei har igjen. Då lærer dei korleis det er å ha og bruke pengar, seier Gundersen.